დღეს ჩვენ უნდა ვისაუბროთ მხოლოდ იმ სულისკვეთებაზე, რომელიც ახლა ამ დარბაზში სუფევს და რომელიც უნდა გავრცელდეს მთელს ქვეყანაში, როგორც ხელისუფლებაში, ისე - კერძო სექტორში. ასევე, ნებისმიერმა ადამიანმა, რომელსაც შეუძლია ამ საქმეს შეეწიოს, ეს უნდა გააკეთოს, რადგან ეს ჩვენი მოვალეობაა ღმერთის, ქვეყნისა და იმ ბავშვების წინაშე, რომლებიც ჩვენ გვყავს.

სადაზღვევო კომპანია „ირაო“ 2014 წლიდან თანამშრომლობს „ბერი ანდრიას სახელობის საქველმოქმედო ფონდთან“ . კორპორატიულ სოციალურ პასუხისმგებლობასთან დაკავშირებული აქტივობები მივუძღვენით საზოგადოების ყველაზე დაუცველ ფენას - სიმსივნით დაავადებულ ბავშვებს.

ფაქტი, რომ ბერი ანდრიას ფონდი მართლაც ძალიან კეთილშობილ საქმეს აკეთებს, ჩვენი აქციონერის - ვენის სადაზღვევო ჯგუფის მხრიდანაც დაფასდა. ბერი ანდრიას ფონდში გამართული სოციალური აქტივობებით ირაო გახდა ვენის სადაზღვევო ჯგუფის CSR კონკურსში გამარჯვებული და ჯილდოდ 30000 ევრო მიიღო, რომლითაც ჩვენ წვლილს შევიტანთ ფონდის ახალი სარეაბილიტაციო ცენტრის - "ბედნიერი სახლის" მშენებლობაში.

ჩემი სახლი სოხუმშია. ჩემი სულიც და გულიც. 22 წელი მეგონა, რომ თბილისში მხოლოდ ხორციელად ვცხოვრობდი. თუმცა ორი წლის წინ მივხვდი, რომ ჩემმა გულმა სხვა თავშესაფარიც იპოვა და ეს ბერი ანდრიას ფონდია. აქ სიყვარულია. აქ თანაგრძნობაა. აქ ყოველი წუთის სიხარულია. აქ იმედია. აქ თავად უფალია.